Mizo historian hlun Pu. B. Lalthangliana chuan Mizo history leh thu leh hla a zirna kawng hrang hranga lehkhabu leh thil hlui a lo lakkhawmte chu vawiin August ni 11, 2025 Thawhlehni khan Government Hrangbana College kutah a hlan a, heng thil hlui dahkhawmna inhlanna leh hawnna hun hi College Library, Archive Room ah hman a ni.
Hrangbana College-a kum 24 chuang lo thawk tawh leh he college-a a thawh chhunga Mizo thu leh hla tihhausak leh tihhmasawn nana sulhnu ropui tak hnutchhiahtu Pu B. Lalthangliana chuan Mizo history zir chiang tura bul a ṭan dan te sawiin, thu leh hla leh culture nena inzawm thil hlui leh thil hlu a lo lâk khawmte chu uluk zawka vawn ṭhat a nih zel theih nan Hrangbana College Archive hnenah phal takin a pe tih a sawi a. Hrangbana College-a a thawh chhunga Principal te leh a thawhpuite'n an phûrpui ṭhin avanga sulhnu nei ve thei a ni chu vannei a intihzia leh lawmawm a tihzia a sawi bawk. Heng thil hlui pawimawhte inhlanna lehkha hi Pi H. Lalthanpuii, Associate Professor leh Archive Comt. Chairman ni bawk hnenah a hlan a ni.
MAL Book of the Year chawimawina ṭum hnih lai lo dawng tawh B. Lalthangliana pual corner-ah hian Mizo ṭawng, Kâwl ṭawng leh Sâp ṭawng thlenga inziak Mizote tana document pawimawh tling thei tur, tun huna hmuh tur leh lei tur pawh awm tawh lo lehkhabu hlu tak tak bakah a lehkhabu kut ngeia a ziah eng emaw zat dah a ni a. A ṭul ang zela tih len tura ruahman a ni bawk. Heng document-te hi History, Culture leh Literature huanga research tite tana hmanraw ṭangkai thei tur a nih angin, Hrangbana College zirlaite leh thawktute bakah, a duh apiang tan hman ṭangkai theih a ni ang.
He hunah hian B. Lalthangliana te nupa bakah Principal, Vice Principal, Mizo Department zirtirtute leh zirlai ṭhenkhatte an tel a ni.
